गाउँ सहर

घरायसी विवाद हुँदा श्रीमानकाे कुटाइबाट श्रीमतीकाे मृत्यु

• गाउँ सहर संवाददाता
• ४ चैत शुक्रबार, २०७८ | १३:०६:०० मा प्रकाशित

काठमाडाैं । श्रीमानको कुटपिटबाट श्रीमतीको मृत्यु भएको छ । झापाको बिर्तामोड नगरपालिकामा श्रीमानको कुटपिटबाट श्रीमतीको मृत्यु भएको हाे । बिर्तामोड–५ का ४० वर्षीय कमल राउतले कुटपिट गर्दा ३९ वर्षीया खेमजुङ गुरुङको मृत्यु भएको प्रहरीले जनाएकाे छ । 

गए राति राउतले घरायसी विवाद हुँदा खेमजुङलाई कुटपिट गरेको जिल्ला प्रहरी कार्यालयले जानकारी दिएकाे छ । श्रीमानको कुटाइबाट गम्भीर घाइते उनको बिर्तामोडस्थित कनकाई अस्पतालमा उपचार सम्भव नभएपछि थप उपचारका लागि विराटनगरस्थित नोबेल अस्पताल लगिएको थियो ।

नोबेल अस्पतालमा पनि उपचार हुन नसकेपछि आफन्तले बिर्तामोडस्थित माइती घर ल्याएकामा गए राति मृत्यु भएको प्रहरीले बताएकाे छ ।

घटनाका सम्बन्धमा थप अनुसन्धान भइरहेकाे प्रहरीले जानकारी दिएकाे छ ।