राजनीति

काठमाडौं क्षेत्र नम्बर ४ मा नेपाली कांग्रेसका गगन र क्षेत्र नम्बर १ मा सिंह विजयी

• गाउँ सहर संवाददाता
• ६ मङ्सिर मंगलबार, २०७९ | १२:४०:०० मा प्रकाशित

काठमाडौं । काठमाडौं क्षेत्र नम्बर ४ मा नेपाली कांग्रेसका उम्मेदवार गगन थापा विजयी भएका छन्। कांग्रेसका  थापाले नेकपा एमालेका उम्मेदवार राजन भट्टराई बिच उनीहरूबीच सात हजारभन्दा बढीको मतान्तर छ।

थापाले २१३०२ मत ल्याएका छन् भने एमालेका भट्टराईले १३८५५ मत ल्याएका थिए।  यहाँ ४५ हजार पाँच सय ३ मत खसेको थियो। यहाँ औपचारिक घोषणा हुन बाँकी छ। काठमाडौं-४ मा यी दुई प्रतिस्पर्धीबीच रोचक प्रतिस्पर्धाको इतिहास छ। २०७४ को निर्वाचनमा पनि यी दुईबीच प्रतिस्पर्धा भएकोमा गगनले बाजी मारेका छन्। २०७० को चुनावमा पनि गगनले एमालेका उम्मेदवार निर्मल कुइँकेललाई हराएका थिए। थापा २०६४ सालमा समानुपातिकतर्फबाट सांसद भएका थिए। 

त्यस्तै, काठमाडौं क्षेत्र नम्बर १ मा नेपाली कांग्रेसका प्रकाशमान सिंह निर्वाचित भएका छन्। उनी राष्ट्रिय प्रजातन्त्र पार्टीका रवीन्द्र मिश्रलाई १३२ मतले हराउँदै विजयी भएका हुन्।कांग्रेस उम्मेदवार सिंहले ७१४३ मत पाएका छन् भने उनका प्रतिस्पर्धी राष्ट्रिय प्रजातन्त्र पार्टीका रवीन्द्र मिश्रले ७०११ मत पाएका छन्। यसअघि २०७४ को चुनावमा पनि प्रकाशमान र रवीन्द्र मिश्रबीच प्रतिस्पर्धा भएको थियो।