गाउँ सहर

याे वर्ष वैदेशिक रोजगारीका क्रममा १३ सय बढि नेपालीले ज्यान गुमाए

• गाउँ सहर संवाददाता
• १७ श्रावण बिहीबार, २०८१ | १५:०६:०० मा प्रकाशित

काठमाडौँ । याे वर्ष अर्थात् आर्थिक वर्ष २०८०/०८१ मा १ हजार ३०५ नेपाली श्रमिकको विदेशमा ज्यान गुमाएका छन् ।

वैदेशिक रोजगार बोर्डले सार्वजानिक गरेको आर्थिक वर्ष २०८०/०८१ को प्रगति प्रतिवेदन अनुसार वैदेशिक रोजगारीको सिलसिलामा ४१ महिलासहित १ हजार ३०५ नेपाली श्रमिकको विदेशमा मृत्यु भएको हो । अघिल्लो आर्थिक वर्ष विदेशमा मृत्यु भएर बोर्डबाट आर्थिक सहायता लिनेको संख्या १ हजार २०८ रहेको थियो । अघिल्लो आवको तुलनामा गत आवमा विदेशमा मृत्यु हुने नेपालीको संख्या १३८ जनाले बढेको छ ।

सरकारले एक वर्षमा वैदेशिक रोजगारीका क्रममा मृत्यु, अंगभंग र बिरामीलगायतका परिवारलाई करिब एक अर्ब आर्थिक सहयोग वितरण गरेको छ । गत आर्थिक वर्षमा वैदेशिक रोजगारीका क्रममा विदेशमा मृत्यु, अंगभंग, बिरामी भएका र अन्य शीर्षकमा सो रकम सहयोग गरेको हो । विदेशी भूमिमा रोजगारीकै क्रममा ज्यान गुमाउँदा उनीहरुका आफन्तलाई मात्र वैदेशिक रोजगार बोर्डले ७० करोड आर्थिक सहयोग गरेको थियो । यो रकम अंगभंग, बिरामी तथा शव व्यवस्थापन खर्चबाहेकको रकम हो ।