राजनीति

ओलीको राजनीतिक प्रतिवेदन : गलत प्रवृत्ति र पात्रहरूका कारण एकीकरण असफल (पूर्णपाठ)

• गाउँ सहर संवाददाता
• ६ बैशाख सोमबार, २०७८ | २०:४९:०० मा प्रकाशित

काठमाडौं । नेकपा एमालेको दशौं महाधिवेशन आयोजक कमिटीको आज बसेको बैठकले अध्यक्ष के पी शर्मा ओलीले प्रस्तुत गरेको राजनीतिक प्रतिवेदन पारित गरेको छ ।

प्रतिनिधिसभा पुनर्स्थापना भए पनि मुलुकले राजनीतिक स्थायित्व प्राप्त गर्ने र वर्तमान समस्याहरूको समाधान हुने सम्भावना एकदमै कम देखिएको निष्कर्ष प्रतिवेदनमा रहेको बैठकपछि पार्टी प्रवक्ता प्रदीप ज्ञवालीले बताए ।

प्रवक्ता ज्ञवालीले प्रतिवेदनमा नेकपाको तीन वर्षे कार्यकालको समीक्षा गरिनुका साथै पार्टी एकीकरणको मनसाय सही भए पनि केही गलत प्रवृत्ति र पात्रहरूका कारण एकीकरण असफल भएको निष्कर्ष निकालिएको बताए ।

बैठकले माधव नेपाल, भीम रावल घनश्याम भुषाल, सुरेन्द्र पाण्डे सहित कर्णाली प्रदेशमा माधव समूहले गरेको फ्लोर क्रसमा संलग्न ४ जना प्रदेश सांसदलाई स्पष्टीकरण सोध्ने निर्णय गरेको प्रवक्ता ज्ञवालीले बताए ।

अदालतको फैसलाबाट तीन वर्षदेखि जारी एकीकृत पार्टी निर्माणको एउटा प्रयास बीचैमा टुंगिएको उल्लेख गर्दै ओलीले त्यसअघि नै पार्टीमा समस्या उत्पन्न भइसकेको दावी प्रतिवेदनमा गरेका छन् । नेकपा निर्माण र यसको अन्त्यबारे समीक्षा गर्दै प्रतिवेदनमा ओलीले प्रचण्डको अवसरवादी र अस्थिर भूमिकाको कारण त्यो एकता असफल भएको आरोप लगाएका छन् ।

ओलीले माधव नेपाल लगायतका नेताहरु पनि पार्टी विभाजनको कारक रहेको उल्लेख गरेका छन् ।उनको आरोप छ, ‘माधव नेपाल लगायत नेकपा एमालेका केही नेताहरूको कुण्ठापरस्त, निहित स्वार्थप्रेरित र गुटगत क्रियाकलापले पनि पार्टी विभाजनमा ठूलो भूमिका खेलेको छ ।’

एमाले महाधिवेशन आयोजक कमिटीको अर्को बैठक वैशाख १० गते बस्नेछ ।