खेल

फाइनल खेलको प्रत्यक्ष प्रसारण : टुँडिखेल, चावहिल फुटबल ग्राउण्ड र सानो गौचरन (हाँडीगाउँ) बाट

• गाउँ सहर संवाददाता
• १४ कार्तिक बुधबार, २०८१ | १२:५०:०० मा प्रकाशित

काठमाडाैँ । साफ वुमन्स च्याम्पियनसिप (साउथ एशियन फुटबल फेडेरेसन वुमन्स कप) २०२४ को फाइनल खेलमा आज नेपाली महिला फुटबल टिमले बंगालादेश विरुद्ध प्रतिस्पर्धा गर्दैछ । यसका लागि नेपाली टिमलाई हौसलका साथ प्रतिस्पर्धामा उत्रन काठमाडाैँ महानगरले "प्रोत्साहित गर्दछौँ" भन्दै काठमाडाैँका तीन स्थानबाट साे खेलकाे प्रत्यक्ष प्रसारण गर्ने व्यवस्था गरेकाे बताएकाे छ ।

उसले भनेकाे छ- "यो खेल हेर्न धेरै दर्शकहरुलाई चाहना छ । तर, खेलमैदानमै पुगेर खेल हेर्ने अवसर सबैलाई प्राप्त हुन कठिन छ । यसकारण, हामीले खेलमैदानमा पुग्न नसक्ने तर खेल मैदान जत्तिकै उत्साहका साथ खेल अवलोकन गर्ने अवसरका लागि टुँडिखेल, चावहिलको फुटबल ग्राउण्ड र सानो गौचरन (हाँडीगाउँ) मा एलइडी स्क्रिनबाट फाइनल खेलको प्रत्यक्ष प्रसारण गर्ने व्यवस्था मिलाउँदैछौँ ।"

साथै उसले "खेलको प्रवर्धन, खेलाडी, प्रशिक्षक र व्यवस्थापकको प्रोत्साहनका प्रदर्शन हुने प्रत्यक्ष प्रसारण खेल अवलोकनका लागि आफूलाई पायक पर्ने स्थानमा जानुहुन फुटबल खेलप्रेमी दर्शकहरुलाई अनुरोध गर्दछौँ ।" भनेकाे छ ।