अर्थतन्त्र

शेयरबजारमा लुकामारी : नेप्सेमा ९० अंककाे गिरावट, झण्डै १३ अर्बकाे काराेबार

• गाउँ सहर संवाददाता
• १९ भदौ बुधबार, २०८१ | १५:१४:०० मा प्रकाशित

काठमाडाैं । शेयरबजारमा केही दिनदेखि उतारचढाव अर्थात लुकामारी चलिरहेकाे छ । एकदिन ह्वात्तै बढ्छ भने एक दिन ह्वात्तै । 

धितोपत्र बजारमा शेयर कारोबार मापक नेप्से परिसूचकको वृद्धि दुई दिन पनि टिकेन । गत साता  २२४ दशमलव ८९ अंकले घटेको बजार साताको पहिलो कारोबार दिन आइतबार पनि ५३ दशमलव ६३ अंकले घटेको थियो ।

त्यसपछिका दुई दिन भने नेप्से उकालो लागेको थियो । सोमबार २७.३२ अंक र मंगलबार ६.९० अंकको वृद्धि भएको नेप्से परिसूचकमा बुधबार पहिरो खसेको छ ।

आज ९०.७३ अंकले घटेर नेप्से परिसूचक २७३९.४६ अंकमा झरेको छ ।

आज कारोबार रकम पनि घटेको छ । मंगलबार १३ अर्ब ५७ करोडको कारोबार भएकोमा यस दिन १२ अर्ब ९२ करोड रुपैयाँको शेयर खरिदबिक्री भएको छ ।

नेप्से ओरालो लागे पनि आज चार कम्पनीको शेयरमा भने सर्किट लागेको छ । आज एक्सेल विकास बैंक, विन नेपाल लघुवित्त, सामुदायिक लघुवित्त वित्तीय संस्था र समाज लघुवित्तको शेयरमा सर्किट लागेको हो ।