अर्थतन्त्र

तीन महिनामै व्यापार घाटा साढे ५ खर्ब नजिक, ३५ प्रतिशतले वृद्धि

• गाउँ सहर संवाददाता
• ११ कार्तिक बुधबार, २०८३ | १९:०६:०० मा प्रकाशित

काठमाडौँ। चालु आर्थिक वर्ष २०८३/८४ को पहिलो तीन महिनामै नेपालको वैदेशिक व्यापार घाटा ५ खर्ब ३२ अर्ब रुपैयाँ नाघेको छ। आयातको तुलनामा निर्यातको आकार निकै सानो हुँदा साउनदेखि असोजसम्मको व्यापार घाटा गत आर्थिक वर्षको सोही अवधिको तुलनामा करिब ३५ प्रतिशतले बढेको हो।

भन्सार विभागले बुधबार सार्वजनिक गरेको तथ्यांकअनुसार चालु आर्थिक वर्षको पहिलो त्रैमासमा नेपालले ६ खर्ब ४६ अर्ब ७८ करोड रुपैयाँको वस्तु आयात गरेको छ। सोही अवधिमा निर्यात भने १ खर्ब १४ अर्ब २८ करोड रुपैयाँमा सीमित भएको छ। यससँगै आयात र निर्यातबीचको अन्तर ५ खर्ब ३२ अर्ब ४९ करोड रुपैयाँ पुगेको हो।

गत आर्थिक वर्ष २०८२/८३ को पहिलो तीन महिनामा यस्तो व्यापार घाटा ३ खर्ब ९५ अर्ब रुपैयाँ रहेको थियो। यस वर्ष आयात र निर्यात दुवै बढे पनि आयातको ठूलो आकार र निर्यातको तुलनात्मक रूपमा न्यून परिमाणले व्यापार घाटालाई थप फराकिलो बनाएको छ।

विभागको तथ्यांकअनुसार गत आर्थिक वर्षको सोही अवधिको तुलनामा चालु आर्थिक वर्षको पहिलो त्रैमासमा आयात ३८ प्रतिशतले बढेको छ। निर्यातमा भने ५७ प्रतिशतको वृद्धि देखिएको छ। निर्यातको वृद्धिदर आयातको भन्दा बढी भए पनि कुल रकमका आधारमा आयातको आकार अत्यधिक ठूलो रहेकाले व्यापार घाटा घट्न सकेको छैन।

गत आर्थिक वर्षको पहिलो तीन महिनामा नेपालले ४ खर्ब ६८ अर्ब ८ करोड रुपैयाँको वस्तु आयात गरेको थियो। त्यस अवधिमा निर्यात ७२ अर्ब ७८ करोड रुपैयाँमा सीमित थियो। यस वर्ष आयात ६ खर्ब ४६ अर्ब ७८ करोड रुपैयाँ पुगेको छ भने निर्यात १ खर्ब १४ अर्ब २८ करोड रुपैयाँ पुगेको छ।

तथ्यांकले निर्यातमा उल्लेख्य वृद्धि देखिए पनि आयातमा निर्भर नेपालको वैदेशिक व्यापार संरचनामा ठूलो असन्तुलन कायमै रहेको संकेत गर्छ। तीन महिनामै ५ खर्ब रुपैयाँभन्दा बढीको व्यापार घाटा हुनुले निर्यातको आकार विस्तार गर्नुपर्ने र आयात तथा निर्यातबीचको खाडल कम गर्नुपर्ने चुनौतीलाई पुनः उजागर गरेको छ।