प्रतिनिधि सभा

भोलिसम्मका लागि सर्‍यो प्रतिनिधिसभाकाे बैठक

• गाउँ सहर संवाददाता
• २१ जेठ बुधबार, २०८२ | १५:५६:०० मा प्रकाशित

काठमाडाैं । प्रतिनिधिसभा बैठक भोलि बिहीबार दिउँसो १ बजेका लागि सारिएको छ । सूचना टाँस गरेर बैठक बिहीबारका लागि सारिएको हो । 

यसअघि बैठक बुधबार दिउँसो १ बजेका लागि तय भएको थियो । तर, सत्ता र प्रतिपक्षबीच सहमति नजुटेपछि सूचना टाँस गरेर दिउँसो ३:१५ बजेका लागि बैठक सारिएको थियो ।

यो समयमा पनि बैठक बस्ने वातावरण नबनेपछि सभामुखले भोलिका लागि बैठक सारेका हुन् । 

यसअघि सभामुख घिमिरेले निरन्तर अवरुद्ध भइरहेको संसद् खुलाउने विषयमा प्रमुख दलका सचेतकसँग छलफल थिए । तर, छलफल निष्कर्षविहीन भयो ।

छलफलमा कानून, न्याय तथा संसदीय मामिलामन्त्री अजय कुमार चौरसिया पनि सहभागी भए । छलफलमा सत्तापक्ष र प्रतिपक्ष आ-आफ्नो अडानबाट टसमस नभएपछि निकास निस्किएन ।

मंगलबार पनि प्रतिनिधिसभा बैठक बस्न सकेको थिएन । दुई पटक सूचना टाँसेर बस्दै नबसी बैठक बुधबार दिउँसो १ बजेसम्मका स्थगित भएको थियो ।

भिजिट भिसा दुरुपयोग प्रकरणमा गृहमन्त्री रमेश लेखकले राजीनामा दिनुपर्ने विपक्षी दलको माग छ भने सत्तापक्ष त्यसमा तयार छैन । सत्तापक्षले गृहमन्त्रीले सदनमा बोल्न पाउनुपर्ने अडान राखेको छ । 

विपक्षी दलहरूले भिजिट भिसा प्रकरणको छानबिन गर्न उच्चस्तरीय समिति गठन गर्नुपर्ने समेत माग राखेका छन् । सत्ता पक्ष समिति गठनका लागि सकारात्मक नभएको विपक्षीको आरोप छ ।