खेल

एनपीएलमा आज जनकपुर बोल्ट्स र पोखरा एभेन्जर्सबीच प्रतिस्पर्धा हुँदै

• गाउँ सहर संवाददाता
• १५ कार्तिक आइतबार, २०८३ | ०७:०९:०० मा प्रकाशित

काठमाडौँ। नेपाल प्रिमियर लिग (एनपीएल) क्रिकेटको तेस्रो संस्करणअन्तर्गत आज जनकपुर बोल्ट्स र पोखरा एभेन्जर्सबीच प्रतिस्पर्धा हुँदैछ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने खेल अपराह्न ५ बजे सुरु हुनेछ। दुवै टोली आजको खेलमा जित निकाल्दै प्रतियोगितामा आफ्नो स्थिति बलियो बनाउने लक्ष्यसहित मैदान उत्रनेछन्।

तेस्रो संस्करणमा जनकपुरले अहिलेसम्म दुई खेल खेलिसकेको छ। पहिलो खेलमा कर्णाली याक्ससँग पराजित भएको जनकपुरले दोस्रो खेलमा काठमाडौँ गोर्खाजलाई हराउँदै प्रतियोगितामा पहिलो जित दर्ता गरेको थियो।

यता, पोखरा एभेन्जर्सले भने प्रतियोगिताको पहिलो खेलमै सुदूरपश्चिम रोयल्ससँग पराजय बेहोरेको थियो। त्यसैले आजको खेल पोखराका लागि पहिलो जितको खोजी गर्ने अवसरसमेत हुनेछ।

जनकपुर जितको लय कायम राख्ने योजनामा रहँदा पोखरा पहिलो जित निकाल्ने लक्ष्यका साथ मैदान उत्रनेछ। यसले आजको खेल प्रतिस्पर्धात्मक र रोचक हुने अपेक्षा गरिएको छ।