अर्थतन्त्र

बैंक तथा वित्तीय संस्थाहरूसँग भएको अधिक तरलता भएपछि ४० अर्ब खिच्दै राष्ट्रबैंक

• गाउँ सहर संवाददाता
• १९ भदौ बुधबार, २०८१ | ११:५७:०० मा प्रकाशित

काठमाडाैं । नेपाल राष्ट्रबैंकले बजारबाट एकैदिन ४० अर्ब रुपैयाँ खिच्न लागेको छ । बैंक तथा वित्तीय संस्थाहरूसँग भएको अधिक तरलता व्यवस्थापन गर्न राष्ट्रबैंकले निक्षेप सङ्कलन उपकरणमार्फत बजारबाट ४० अर्ब रुपैयाँ खिच्न लागेको हो ।

राष्ट्रबैंकले जारी गरेको २१ दिने निक्षेप सङ्कलन उपकरणका लागि बुधवार नै बोलकबोल हुनेछ । 

बुधवार दिउँसो ३ बजेसम्म अनलाइनमार्फत हुने बोलकबोलमा बैंक तथा वित्तीय संस्थाहरूले घटीमा १० र बढीमा ५ करोड रुपैयाँले निःशेष भाग जाने गरी कुल आह्वान रकमसम्म आवेदन गर्न सक्नेछन् । 

राष्ट्र बैंकको पछिल्लो विवरणअनुसार बैंक तथा वित्तीय संस्थाहरूसँग ६४ खर्ब ६४ अर्ब रुपैयाँ निक्षेप रहेको छ । जसमध्ये ५१ खर्ब ९४ अर्ब रुपैयाँ बैंक तथा वित्तीय संस्थाले लगानी गरेका छन् । 

अहिले बैंक तथा वित्तीय संस्थाहरूको सीडी रेसियो ७८.९४ प्रतिशत रहेको छ । जुन राष्ट्रबैंकले ९० प्रतिशतसम्म राख्न सक्ने व्यवस्था गरेको छ । सीडी रेसियो कम हुँदा बैंक तथा वित्तीय संस्थाहरूले गर्ने लगानी कम भएको बुझिन्छ ।